Најголемиот интернет пребарувач Гугл вчера во Њујорк го претстави својот нов портал, кој ги содржи уставите на земјите од целиот свет, со цел во најголема мерка да им помогне на државите во политичка транзиција.
– Сакавме онлајн да ги собереме сите устави во светот, за да им бидат достапни на сите и корисни за владите во уставен процес, изјави директорот на сектор во Гугл, Џаред Коен, претставувајќи ја интернет страницата www.constituteproject.org во Њујорк, каде оваа недела се одржува Генералното собрание на ОН.
Оваа иницијатива, која ја поддржа универзитетската програма од САД и Велика Британија како „Проект за споредба на устави“, овозможува пристап до сите устави кои стапиле во сила до овој месец, и тоа од сите држави во светот.
Порталот нуди 350 теми, со цел да се олесни споредувањето на некои прашања, како на пример правата на малцинствата или финансирањето на изборни кампањи.
Во втората етапа, Гугл планира порталот да биде достапен на сите шест јазици во ОН (англиски, француски, шпански, руски, арапски и кинески).
Една од целта на порталот е да им го олесни составувањето на устави на земјите кои излегуваат од политичка криза или вооружен конфликт.