Филмската и телевизиска дива, саканата Мис Пиги, доби феминистичка награда за нејзиниот општествен придонес од Центарот „Елизабет А. Саклер“ на свеченост што се одржа синоќа во њујоршкиот музеј Бруклин.
– Возбудена сум, но искрено, не и изненадена со наградата, „изјави“ Мис Пиги пред свеченоста на која беше поканет и нејзиниот долгогодишен партнер во телевизиската серија „Мапет Шоу“, жабецот Кермит.
Центарот „Елизабет А. Саклер“ доделува годишни награди на жени кои биле пионерки на некое поле.
Елизабет А. Сакклер, претседателка на Центарот за феминистички студии, теории и женски прашања во образложението на наградата рече дека Мис Пиги „отелотворува извонреден дух, решителност и трпеливост“ и дека генерациите на нејзините обожуватели „ги подучувала како да ги надминат пречките“.
Мис Пиги или прасицата Гица е еден од главните ликови во популарната телевизиска серија „Мапет Шоу“, која се прикажуваше од 1976 до 1981 година, како и во повеќе филмови, меѓу кои последниот е „Muppets Most Wanted“ од 2014 година.