Извршниот директор на американската технолошка компанија „Астроном“, Енди Бајрон, е суспендиран откако беше фатен како изневерува со колешката Кристин Кабот на концертот на „Колдплеј“ во Бостон.
„Астроном“, компанијата каде што се вработени двајцата, одговори со официјално соопштение два дена по настанот, најавувајќи истрага.
„Астроном е посветен на вредностите и културата што нè водат од нашето основање. Од нашите лидери се очекува да постават стандарди и во однесувањето и во одговорноста“, наведоа тие.
Во истото соопштение се додава дека одборот на директори започнал формална истрага и наскоро ќе сподели дополнителни информации. Исто така, беше нагласено дека видеото не ги прикажува другите вработени во компанијата.
Во меѓувреме, Пит ДеЏој, коосновач и главен директор за производи, е именуван за привремен извршен директор.
Компанијата, исто така, ја негираше изјавата на Енди Бајрон што кружи на интернет, тврдејќи дека таквите коментари се лажни и дека тој лично не дал никаква изјава.
Инаку, сега суспендираниот директор на „Астрономер“, Енди Бајрон, и директорката за човечки ресурси на истата компанија, Кристин Кабот, беа фатени во измама на концертот на „Колдплеј“ во Бостон, а за скандалот продолжува да се зборува на социјалните мрежи, а мемиња ги преплавија сите платформи.
Бајрон ја прегрна Кабот, а нивната блискост ја забележа фронтменот на бендот Крис Мартин, кој се пошегува: „О, погледнете ги овие двајца“, по што беа прикажани на големиот екран.
Само неколку секунди подоцна, Бајрон нагло ги пушти рацете на Кабот и се обиде да се скрие зад оградата, додека таа го покри лицето со рацете. Сцената предизвика смеа кај публиката, а Мартин рече: „Или имаат афера, или се само многу срамежливи“.
Видеото набрзо беше споделено на социјалните мрежи, а многу гледачи го обвинија Бајрон за брачно неверство. Патем, Бајрон е во брак со Меган Кериган Бајрон, со која има две деца, а се наведува дека и Кристин Кабот е во брак.