Пред вратите на ресторанот „Калета“ во Стариград (Хрватска), туристите и минувачите беа пречекани од порака што измами насмевка на лицата на многу луѓе – и им ги промени плановите за вечера.
„Шефот штотуку доби бебе. Денес не работиме, само пиеме“, пишуваше на знакот на влезот во ресторанот.
Информациите се дека сопственикот на ресторанот и неговата партнерка добија девојче кое го крстија Мари.
Пресреќниот татко одлучи да го затвори ресторанот за гостите и да организира прослава за своето семејство и најблиските пријатели.
Иако не успеаја да вечераат, туристите што се најдоа пред ресторанот беа воодушевени, и можеа да се послужат со пијалак и да наздрават ако сакаат.
„Прославуваме раѓање на дете. Уживајте во бесплатни пијалаци“, пишуваше на знакот до масата каде што имаше чаши и пијалаци што можеа да се послужат.
Многумина ги фотографираа натписите и рекоа дека со задоволство ќе се вратат друг ден на ручек или вечера, само поради тој искрен, човечки гест.