Во винаријата Камник во Скопје денеска беше отворен Гастрономскиот фестивал ИЦЕ2017 (Innovative Culinary Experience) што ќе овозможи да се запознаат шест интернационални кујни, во шест посебни мастер клас обуки и гала вечер, презентирано од шест мастер шефови, шест шефови и шест млади готвачи.
Идејата за овој настан е на шеф Марк Де Јонг, а неговата цел е мастер шефови да дојдат во Македонија да ја почувствуваат традицијата и културата преку изворни кулинарски рецепти од земјава, како и да се разменат искуства и нови иновативни техники од кулинарството. Настанот е поддржан од здружението Macedonian Multiethnic Culinary Chefs – ММЦЦ.
На фестивалот присуствуваат мастер шефовите Ралф Менегини, Стефан Пјер, Родриго Дуранд, Ердем Дирбали, заедно со членовите на професионалната организација на готвачи-ММЦЦ, шефовите Дејан Карапеев, Бобан Симоновски, Зоран Мајновски, Зоран Андоновски, Никола Мишковски и Марк Де Јонг.
Во слободно време учесниците на првиот гастрономски фестивал во Македонија и поширокиот регион ќе имаат можност да се запознаат со убавините на земјава, но и да ја пробаат македонската храна.