До раните утрински часови струмичани се забавуваа и уживаа во рок музиката, а во рамките на фестивалот „Парксток“ кој по примерот на легендарниот „Вудсток“ по втор пат се одржа во Струмица.
Амфитеатарот во големиот градски парк беше претесен за да ги собере сите љубители и почитувачи на рокот, но им овозможи максимално да уживаат и да се забавуваат со свирката на младите бендови кои им понудија прекрасна изведба на познатите хитови од рок музиката.
Според организаторите, главната порака на фестивалот е младите што повеќе да уживаат во слободата, рок музиката, да ја пренесуваат љубовта и да го негуваат мирот.
-Иницијативата произлезе од група млади луѓе кои слушаат една поинаква музика. Првично мислевме да се собереме со два инструмента и да направиме забава за нас, но после дојде идеа да се собереме во поголем број со повеќе инструменти и така излезе „Парксток“, значи се се случи спонтано. Многу сме задоволни, од големиот одзив, но и од позитивните критики од минатата година и затоа одлучивме и оваа година да продолжиме и се надеваме дека овој фестивал ќе стане традиционален, рече Љубомир Митровски, организатор на фестивалот.
На второто издание на „Парксток“ учестуваа бендови од Струмица и Охрид, а се реализираше со поддршка на градоначалникот на општина Струмица, Зоран Заев, здружението „Новус“ и почитувачи на рок музиката.
