Поетската книга „Живот под ѕвездите” од Елена Пренџова од Скопје ја доби наградата „Македонска книжевна авангарда“ на конкурсот за ново авангардно книжевно творештво што го распиша Фондацијата за културна и научна афирмација и презентација „Македонија презент”.
На конкурсот пристигнале 33 ракописи, од кои најголем број биле поетски книги и збирки со раскази и драми, а помалку романи и книги со критики и есеи. Нив ги разгледал селекторот Христо Петрески, кој ракописот на Пренџова го избрал за најдобар. Тој ќе биде отпечатен во почетокот на наредната година и промовиран во април на саемот на книгата во Скопје. Тогаш на Пренџова ќе и биде врачена и наградата „Македонска книжевна авангарда”.
Нејзиниот поетски ракопис „Живот под ѕвездите” содржи 53 песни, поделени во два циклуса: „Урбанки” и „Наивки”. – Станува збор за урбана, сигналистичка поезија, која е специфична и оригинална и според тематско-мотивската носивост и содржина, но и според необичниот графички и визуелен изглед на песните, информира „Македонија презент“.
Во најтесен избор за наградата биле и Марина Мијаковска со ракописот „Жанровски полимер (сандаче од ракописи во обид)” и Ратка Шоклеска со ракописот „Така родена”.