Револтирани родители се обратија до општина Центар, известувајќи ја дека не се согласуваат да се одзема дел од училишниот двор во Основното општинско училиште „Кочо Рацин“.
Општина Центар доби известување од Град Скопје, дека со проширувањето на улицата „Водњанска“, ќе се навлезе до еден метар и седумдесет сантиметри во дворот на училиштето.
Градоначалникот Андреј Жерновски најостро се спротивставува на решението да се одзема нешто што им припаѓа на учениците и на училиштето и затоа го повикува градоначалникот на град Скопје да се откаже од узурпацијата на училишниот двор.
Инаку станува збор за одобрение по спорниот ДУП „Тасино Чешмиче“, кој беше изгласан во Советот на општината незаконски и со недоволно мнозинство.
Градоначалникот, поради штетните решенија за граѓаните, стави вето на примена на ДУП-от, но повторно беше ставен на седница на Советот. Одлуката на Советот, како незаконска, Жерновски ја обжали на Уставен суд, но Судот со мнозинство, се прогласи за ненадлежен, соопштуваат од општина Центар.