Интензитетот на сообраќај на патните правци надвор од градските средини е зголемен. На граничните премини нема подолготрајни задржувања за влез и за излез од државата, информира Автомотосојузот на Македонија.
Забрана за движење на тешки товарни возила има на регионалниот пат Пробиштип – Кратово поради појава на свлечиште, на влез во Кратово, како и на патот Радовиш – Конче, исто така поради свлечиште. На патниот правец Кичево – Охрид во близина на Ботун поради изведување градежни работи на пат, сообраќајот се одвива наизменично регулиран со семафори за што е поставена соодветна сообраќајна сигнализација.
На магистралниот пат А2 од влезот до излезот на Кичево се изведува надградба на асфалтна подлога за што е поставена соодветна сообраќајна сигнализација. На патниот правец А-1 Гевгелија – Скопје од надвозникот кај клучка Велес до наплатната станица „Отовица“ се изведуваат работи на мостовите за што е поставена соодветна вертикална сообраќајна и светлосна сигнализација, а сообраќајот се одвива по една сообраќајна лента само по мостовите.
На патниот правец Фурка – Дојран, Р-1105, се изведуваат градежно-асфалтерски работи. Поставена е соодветна патна сигнализација. Во тек се и градежни работи за реконструкција и рехабилитација на патната секција Велес – Кадрифаково, фаза 2 од депонијата Велес до с.Лозово.
Сообраќајот на сите останати државни патишта во Македонија се одвива без забрани, по суви коловози.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Демир Капија – Удово, Кочани – Делчево и Берово – Виница, каде е можна почеста појава на одрони.