Земјоделците да ја искористат државната поддршка за осигурување на посевите, апелира Владата.
Сумата за оваа намена, како што соопшти денеска на прес-конференција портпаролот Александар Ѓорѓиев, е двојно зголемена, од 17 милиони денари лани на 35 милиони годинава.
– Целта е парите да отидат во вистински раце. Ако е неопходно, проектираната сума ќе ја зголемиме, истакна Ѓорѓиев.
Со поддршката Владата овозможува покривање 60 проценти од вкупните средства за осигурителните полиси. Земјоделците веќе од идниот месец ќе може да поднесуваат барања до Платежната агенција за добивање на дефинираната помош. Рокот ќе трае најмалку до крајот на август.
Постапката за аплицирање е многу едноставно, се сведува на само три чекори.
– Земјоделецот поднесува барање до Подрачната единица на ресорното Министерство врз основа на што добива потврда за пријавени производни капацитети. Ја доставува потврдата до осигурителната компанија што ја бира по сопствена желба и со неа склучува полиса. Земјоделецот се задолжува со 40 отсто од вредноста на полисата, а за останатите 60 проценти се задолжува Агенцијата, објасни владиниот портпарол.
За добивање на средствата нема посебни услови, важат истите оние како и за субвенциите.