Државниот санитарен и здравствен инспекторат затвори уште една дива гинеколошка ординација во Струга во која работела докторка вработена во струшката општа болница. Полицијата и инспекторите два часа преговарале со сопствениците на објектот кои не им дозволувале да влезат во ординацијата на „Кеј 8 Ноември“ за да направат вонреден надзор по добиена дојава дека во ординацијата се врши гинеколошко – акушерска дејност без потребните дозволи.
„По двочасовно преговарање со сопствениците на објектот, инспекторите и полицијата влегоа во посочениот простор, кој имал 25 м2 и бил опремен за ординација за гинекологија и акушерство, при што затекнататата фактичка состојба индиректно укажува дека во него се вршела гинеколошко акушерска дејност. Притоа објектот воопшто не бил обележан за дејноста. Просторијата во која се одвивала гинеколошко акушерската дејност е во сопственост на д-р З.П.Ш. доктор специјалист по гинекиологија и акушерство, вработена во ЈЗУ ОБ Струга“ велат од Инспекторатот.
При надзорот на инспекторите им бил покажан договор за отстапување на користење на простор од 01/2021 година, каде стои дека просторијата се издава на времено користење на ПЗУ Д-р Благоја Парталоски.
„Наведената приватна здравствена установа ПЗУ Д-р Благоја Парталоски има решение издадено од Министерството за здравство од 1999 година, дека исполнува услови (простор, опрема и кадар) за вршење на специјалистичко гинеколошко акушерска дејност на горе споменатата адреса, а која во моментот нема носител на дејност бидејќи д-р Парталоски е во пензија од 2009 година а има отстапувања и во однос на просторот“, утврдил Инспекторатот.
По увидот, кој се уште е во тек, Инспекторатот ќе издаде решение за забрана за вршење на дејност поради неисполнување на услови за вршење на дејност, а истовремено ќе го извести и Министерството за здравство за одземање на дозволата за работа.
Ова е втора дива ординација во Струга што ја затвора Инспекторатот. Минатиот месец беше затворена дивата ординација на директорот на болницата Мухамед Асани кој дома прегледувал пациенти, а случајот го пријави пациентка на која по породување со царски рез и биле извадени матка, јајник и бубрег.