Носителот на кандидатската листа за пратеници во Петтата изборна единица од партијата Левица, Здравко Савевски, денеска на средба со граѓаните во Битола истакна дека доколку ја добие поддршката, ќе се залага да се укине собирањето пари при полагање за возачка дозвола.
Според Савевски, државата зема многу пари од авто-школите на сметка на граѓаните кои полагаат за возачка.
– Левица е на страната на обесправените, а дел од граѓаните и сопственици на авто-школи побараа олеснување на нивната работа бидејќи во Македонија има само осум испитни центри и монополизација на бизнисот. Тоа создава зголемување на цените за возачка дозвола и притоа посебно се оштетени граѓаните на Битола кои во недостиг на полигон мора да патуваат во Ресен и Прилеп, рече Савевски.
Посочи дека е недозволиво во Битола да нема сообраќаен полигон и, како што рече, нелогично е полагањето за возачка дозвола да се снима од камера со што се крши правото на приватност на кандидатите.
