Реконструкцијата на регионалниот пат Фурка – Дојран во вкупна должина од 3,8 километри заврши со доасфалтирање на преостанатите 1,3 километри. Ја изведе „Македонија-пат“ преку Јавното претпријатие за државни патишта кое за оваа намена инвестираше околу 26 милиони денари.
– Се ќе биде готово за околу една недела. Сите градежни работи се завршени и останува само хоризонталното и вертикално бележење и завршувањето на останатите пропратни сообраќајни елементи, изјави директорот на ЈП за државни патишта Љупчо Георгиевски.
Тој најави дека во соработка со локалната самоуправа веќе се изготвува и проектната документација за рехабилитација на патот Нов Дојран – Николич во должина од 6 километри и коловозна лента широка 5,5 метри.
– Ова е еден од пофреквентните патни правци во општината од големо значење за локалната самоуправа, посебно за Николич. Проектот беше баран од граѓаните и сигурно ќе го помогне развојот на индустријата во ова населено место, нагласи градоначалникот на Дојран Борче Стамов.