Кампањата на Град Скопје за бесплатно собирање остатоци од берба, која има за цел да се спречи палењето стрништа, за оваа година заврши.
Од Град Скопје информираат дека од заинтересираните граѓани кои се пријавиле на телефонскиот број 071 395 395, бесплатно се подигнати околу 260 кубни метри органски отпад. Посочуваат дека од следната година, оваа активност ќе влезе во годишната програма за работа на ЈП „Комунална хигиена“ и како услуга повторно ќе им биде достапна на граѓаните.
– Градот Скопје и оваа година ја продолжи кампањата за бесплатно собирање на остатоците од берба за да се спречи палењето на стрништата, а со тоа да се заштити воздухот од загадување. Оваа кампања годинава го опфати целиот Скопски плански регион. Во кампањата се вклучи и Министерството за земјоделство, шумарство и водостопанство во делот на планирањето на периодите кога се врши бербата на различните земјоделски култури, како и Халк Банка со поддршка на промотивните активности, соопштуваат од Град Скопје.
Кампањата првпат беше организирана минатата година, од Град Скопје со поддршка од УНДП и МДЦ-Ти.нет. Градот Скопје е прва единица на локална самоуправа која спроведува кампања за елиминирање на палењето на нивите и стрништата, за да се намали загаденоста на воздухот, да се зачува плодноста на почвата, но и да се спречи ширењето на евентуални пожари кои неретко предизвикуваат материјални штети, а понекогаш загрозуваат и човечки животи.