Собранието на Република Македонија денеска ќе го одржи седмото продолжение на 34. седница, на која се очекува да се гласа по дополнетиот предлог закон за здравствена задолжница.
Извештајот за работата на Судскиот совет на Република Македонија за 2011 година и Годишниот извештај за работата на Советот на јавните обвинители на Република Македонија за 2011 година се меѓу точките на дневниот ред на седницата.
По завршувањето на 34-та, Собранието ќе продолжи со 30-та седница.
На агендата на оваа седница се предлог законите за изменување и дополнување на Законот за постапување со бесправно изградени објекти, на Законот за просторно и урбанистичко планирање и на Законот за градење, сите во прво читање.
Пратениците ќе расправаат и по Предлог законот за изменување на Законот за буџетите и Предлог законот за изменување и дополнување на Законот за извршување на Буџетот на Република Македонија за 2012 година, во прво читање, поднесен од пратениците од опозицијата.
Се очекува да се дискутира и по Предлог законот за изменување и дополнување на Законот за јавните набавки и предлог законите за дополнување на Законот за социјалната заштита и на Законот за слободен пристап до информации од јавен карактер.