Кандидатот за градоначалник на ВМРО-ДПМНЕ за Општина Штип, Илчо Захариев на денешната прес-конференција најави дека идната локална власт ќе го изгради кејот на реката Брегалница и ќе го уреди просторот по течението на реката од населбата „8-ми Ноември“ до штипско Ново Село и бањата Кежовица.
– Брегалница мора да ја уредиме од две причини – прво да не претставува опасност за населението и населбите од поплавување, но и да направиме едно убаво место, шеталиште за нашите граѓани, штипјани, каде што децата ќе возат велосипеди, каде пензионерите ќе пешачат. Ќе ставиме клупи, ќе направиме дрвореди и кочено ќе ја приближиме оваа река до граѓаните, каде што 80 години ништо не е направено токму овде, рече Захариев.
Тој вели дека за овој проект имаат јасно дефиниран буџет, а неговата реализација би почнала веднаш.
Захариев истакна дека идната локална власт има и три големи инфраструктурни проекти, а тоа е доизградба на улицата „Вардарска“ до првата половина на 2014 година, доизградба на булеварот „Партизанска“, кој ќе ги поврезе населбите „8-ми Ноември“ и „Баби“ и реконструкцијата на улицата „Христијан Карпош“ во центарот на градот.