Претседателот на СДСМ, Зоран Заев, придружуван од заменик претседателката Радмила Шекеринска вечерва се сретна со претседателите на Р.Словенија и на Р.Хрватска, Борут Пахор и Колинда Грабар-Китаровиќ, придружувани од амбасадорите на Словенија и на Хрватска во Македонија, Бранко Раковец и Данијела Баришиќ.
На состанокот е изразена голема загриженост за ексалацијата на политичката криза во земјава, посебно по потегот на Ѓорге Иванов со кој направи државен удар врз правниот поредок во Република Македонија.
-Инсистираме Иванов да ја повлече апсурдната одлука, а и самиот тој веднаш да поднесе оставка. Ова не е само суспендирање на Договорот од Пржино, туку и погазување на Уставот и законите. Пред Уставот и законот сите мора да бидат еднакви и никој нема право да ги заштитува криминалците исплашени од Специјалното јавно обвинителство, како што тоа се обидува да го направи Иванов. СДСМ е цврсто решена да ги врати инстититуциите во владение на граѓаните, соопшти претседателот на СДСМ, Зоран Заев.
Претседателот Заев и заменик претседателката Шекеринска нагласија дека актуелната власт бега од фер избори, но дека во Македонија мора да се спроведат регуларни избори на коишто Македонија, преку слободно изразена волја на граѓаните, ќе добие нова, одговорна и легитимна власт.
-Секој друг развој на настаните од доследно спроведување на нотираните услови за спроведување фер, демократски и регуларни избори, ќе нанесе непоправливи штети врз државата и граѓаните, и за тоа целата вина е кај актуелната власт којашто свесно ја комплицира ситуацијата, рече претседателот Заев.
На средбата се разговараше за можните последници од неодговорното владеење на партиите на власт и на послушникот Ѓорге Иванов, како и за чекорите што планира да ги преземе СДСМ како најголема опозициска партија, во насока на враќање на демократските процеси во Република Македонија.