Претседателот на Владата на Република Македонија, Зоран Заев денеска оствари средба со поранешниот премиер на Република Словенија, Антон Роп.
На средбата беа разменети размислувања и искуства што Република Словенија ги имала во процесот на пристапување и интегрирање во ЕУ и НАТО, кои заеднички беа оценети како исклучително корисни за Република Македонија во продолжување на процесите за европската и евро-атлантската интеграција на земјата.
Во таа насока се одвиваше и дискусијата и беше констатиран напредокот што земјата го направи во меѓународната политика и интеграциските процеси, но беа разгледани и можностите за продлабочување на соработката со Република Словенија во повеќе области, за подобра и поефикасна искористеност на парите од европските фондови, за поедноставени процедури во подготовка на проектна документација, како и за можностите за ефикасно користење на евтини кредитни линии од повеќе меѓународни финансиски институции.
Премиерот Заев посочи дека Република Словенија е една од земјите пријатели на Република Македонија, и поддршката што ја добиваме од Словенија во интеграциските и реформските процеси, премиерот ја оцени како исклучително важна.