Претседателот на СДСМ, Зоран Заев и заменик претседателката Радмила Шекеринска попладнето имаа средба со специјалниот претставник на Германија за Западен Балкан, Ернст Рејчел и со амбасадорката на Сојузна Република Германија во Република Македонија, Кристине Д. Алтхаузер.
Тема на средбата беше предизвикот пред којшто се исправени граѓаните на Македонија за заштита и остварување на нивните основни човекови права, слободата и правдата, како и актуелните состојби во Република Македонија.
Претседателот Заев посочи дека објавените снимки што потврдуваат дека Груевски и Мијалков ги прислушуваат граѓаните во Македонија се само дел од доказите за незаконското и криминалното функционирање на актуелната власт.
-Затоа СДСМ и коалициските партнери го почнаа проектот Вистината за Македонија чијашто цел е враќање на слободата на граѓаните и нормализирање на Македонија преку обнувување на напуштените демократски вредности, рече претседателот Заев.
Претседателот на СДСМ, Заев и заменик претседателката Шекеринска, го поздравија децидниот став на Сојузна Република Германија со којшто Германија побара од властите во Македонија функционирање според меѓународните стандарди.