Новиот претседател на СДСМ, Зоран заев, првиот ден по вчерашниот, како што вели, историски конгрес на СДСМ, искрено им се заблагодарува на сите членови, делегати и на досегашното раководство на СДСМ за демонстрираното ниво на политичка зрелост, култура и прагматизам изразени во деновите на подготовка и вчера, на денот на одржување на Конгресот.
Желбите, надежите, очекувањата на нашите противници и нивните медиумски пропагатори за неуспех, кавги и поделби во партијата за наша среќа, вели Заев, а на нивна огромна фрустрација, се покажаа како тотална заблуда и целосно промашена проценка.
„Од овој конгрес СДСМ излегува гордо и достоинствено. Обединет, моќен, триумфален. Овој наш славенички момент што сите го заслуживме е вовед во серијата успеси што следуваат. Свесен сум дека веќе од денес не чека многу работа. Сурова и исцрпувачка битка со режимот на ВМРО-ДПМНЕ. Јас ѝ го ветив враќањето на победничкиот менталитет на мојата партија. Дојде ред ветувањето да го исполнам. Од денес започнува поразот на ВМРО-ДПМНЕ и демаскирање на политиките на Груевски. Многу брзо ќе се радуваме на успесите“, вели Заев.
Уште еднаш, како еден од најблиските соработници, изрази почит и му се заблагодари на Бранко Црвенковски за сѐ што во изминативе години направи за партијата. Неговата мудрост и искуство, вели, секогаш ќе бидат од огромна корист за СДСМ во годините и предизвиците што претстојат.
„До вас, почитувани членови на СДСМ. Од срце ви порачувам. Огромна чест, задоволство, но и одговорност е за мене што сум ваш претседател. Ајде одново, со елан и полн капацитет да се вложиме сите заедно. За победнички СДСМ, за просперитетна Македонија“, вели Зоран Заев.