„Вечерва Дебар ја испрати најсилната порака до сите страни на Македонија, единствени, сплотени сме, обедените сме за нас, за нашите деца, за живот во Македонија“, рече претседателот на СДСМ, Зоран Заев на вечерашниот митинг во Дебар.
„Оваа полна сала вечерва покажува дека заврши времето на поделби, како што не делеа во изминативе десет години по сите основи и партиски и национални. Покажавме и докажавме дека можеме да бидеме заедно во борбата за иднина тука во Македонија. Сакам да ви кажам дека на мене може да сметате како на брат. Стоите на вистинската страна. И покрај сите закани и притисоци вие вечерва дојдовте овде заедно, за да ги вратиме младите тука, сите заедно да градиме нов живот во Македонија“, додаде Заев.
Тој на митингот во Дебар ги повика сите административни работници, сите приматели на социјална помош и сите приматели на субвенции да се охрабрат да не се плашат повеќе од притисоци и закани и да се приклучат без страв во борбата за нов живот во Македонија.
„Ова не се избори за СДСМ или ВМРО ДПМНЕ, ова не се избори за политички партии, ова се избори за нас, за нашите деца, за нашите внуци. Ова се избори за нашиот живот, тука во Македонија. На 11-ти декември да го заокружиме бројот 4 и да ги вратиме слободата, демократијата, правдата и животот на сите“, порача претседателот Заев од митингот во Дебар.