Премиерот Зоран Заев денеска оствари средба со претставници на Националниот младински совет со кои се договорени конкретни чекори на соработка.
Владината прес-служба соопшти дека на средбата се разгледани иницијативата за изнаоѓање на трајно одржливо буџетско решение за Националниот младински совет и конкретните предлог-решенија за инклузивност на младите, особено како коректив во креирањето на политиките на ниво на владини тела.
– Лично се сметам за политичар кој е поддржувач на младите и младинските политики уште од периодот кога бев градоначалник. Сега од позиција на премиер, ќе се обидам преку формирање на буџетот да ги охрабрам и локалните самоуправи да го следат примерот на Владата и тие да определат буџет за поддршка на локалните младински совети, истакнал премиерот Заев.
Тој ги охрабрил претставниците од Советот да изготват идеи и решенија што ќе ги претстават пред Владата, а кои ќе бидат во насока на покревање на свеста за јакнење на младинскиот активизам, инклузивност на младите во општествените процеси и креирање на највисоките младински политики во државата.
Разговарано е и за можноста за формирање заедничка мониторинг комисија што би се занимавала со Младинската гаранција и нејзината имплементација.
Претставниците од Националниот младински совет изразиле силна поддршка за Младинската гаранција, со која, како што посочиле, Македонија е единствената држава во регионот во имплементирање на младинската ЕУ политика, како земја која се уште не е членка на ЕУ. Тие истакнале дека можат да бидат ресурс во имплементирање на Младинската гаранција во насока на следење и подобрување на процесот на спроведување на оваа владина мерка, со што ќе се зацврсти пораката дека младите се во центарот на интересот на новата Влада.