Премиерот Зоран Заев придружуван од шефот на дипломатијата Никола Димитров и државниот секретар во МНР Виктор Димовски, денеска се сретна со Карин Кнајсл, австриска министерка за Европа, интеграции и надворешни работи, придружувана од Ренате Колбер амбасадорка на Австрија во Македонија.
На средбата, како што соопшти владината прес-служба, се потенцирани добрите релации меѓу двете држави на политички и на економски план и е изразено заедничко уверување дека е отворен простор за продлабочување на билатералната соработката во сите области.
Кнајсл пренесе дека се забележани промени во државава во насока на надминување на финансиските ризици и создавање услови за фискална предвидливост, по политичката криза минатата година и оти постои мотив кај бизнис заедницата во Австрија, за нови инвестиции и отворање нови работни места во Македонија.
Посочи дека Австрија ги поддржува интеграциите на Македонија и на Западен Балкан во ЕУ и оти фокусот на претстојното австриско претседателство ќе биде кон исчекори на државите од регионот на овој пат. Нагласено е дека Австрија гледа на Западен Балкан како на дел од Европа и дека во таа насока важно е поврзувањето меѓу државите и реформите што ги прават.
– Македонија отвори ефикасен реформски процес за да го подобри квалитетот на живот на граѓаните применувајќи ги европските вредности и добрососедски политики, што го покажуваат постигнатиот Договор со Бугарија и разговорите што се водат на достоинствено ниво со Грција. Македонија и сите шест држави од Западен Балкан се посветени на меѓусебното поврзување и на пријателско решавање на билатералните прашања. Секоја од државите ја заслужува својата шанса на евроинтегративниот пат. Ја почитуваме многу поддршката од Република Австрија, којашто е еден од најголемите инвеститори во Македонија и во име на граѓаните на Република Македонија изразувам благодарност за поддршката што ја имаме во остварувањето на нашата стратешка цел, членство во ЕУ, рече премиерот Заев.
На состанокот беше нагласена добрата соработка меѓу полициските претставници посебно на границата за надминување на предизвиците од мигрантската криза. Исто така оценета е за позитивен чекор во развојот на меѓудржавната соработка и најавената интерпарламентарна соработка.
Заев, преку министерката за Европа, интеграции и надворешни работи на Австрија, упати покана за официјална посета на австрискиот канцелат Себастијан Курц на Македонија.