Влатко Ѓорчев го праша премиерот Зоран Заев кога ќе стави ред во јавните финансии и дали ќе го сопре ужасното трошење на народни пари и за политички пазарења.
„Вашиот генерален секретар Александар Кирацовски е потпишан на законот во сите Јавни претпријатија да има заменици директори. Ова е скандалозно и срам. Децата на функционерите и шарените ги вдомивте. Јадењето живи луѓе го покажавте со бркањето на Цветан Трипуновски од Министерството за земјоделство само затоа што надвор од работно време држел прес конференции. Дали конкурсите се наместени за членови на СДСМ и дали општинските организации на СДСМ одлучуваат кој каде ќе биде вработен“, праша Ѓорчев.
„Намерата ми е искрена. Немаме намера и нема политички реваншизам. Доволно е политичкото делење. Сакам помирувањето да пристигне до секого. Нови 47.000 работни места се отворени, најголемиот дел се во приватниот сектор. Секој има право на работа. Се прима според квалитет, а не според партиска одлука. За тоа кој ја води кадровската политика на СДСМ, ве поканувам на кафе во СДСМ и таму ќе ви одговорам и ќе разговараме“, рече Заев.
Ѓорчев не одговори дали ја прифаќа поканата.