Секторот за внатрешни работи Битола, криминалистичката полиција при СВР Битола и Надворешните канцеларии за криминалистички работи во Прилеп и Ресен во содејство со Државен пазарен инспекторат вчера извршиле контроли на повеќе локации во Битола, Прилеп и Ресен каде се врши трговија со отпад.
Како што информираат од МВР, во Битола била извршена контрола на три локации во населба „Баир“, кои ги користат А.А.(41), Ф.М.(44) и И.Џ.(46 ), сите од Битола, при што било констатирано дека не поседуваат никаква документација и дека немаат регистрирано правно лице за вршење на дејноста.
Во Прилеп била извршена контрола во складишта во село Мало Коњари, во село Селце и на плац на ул.„Гостиварска“ во Прилеп, кои ги користел А.Ш.(54) од Прилеп, како и на плац на ул.„Беровска“, кој го користел К.И.(31) од Прилеп. При контролата, исто така, било констатирано дека лицата вршеле дејност без регистриран правен субјект.
Од МВР соопштија дека и во Ресен биле извршени контроли на две локации на кои се вршел откуп на отпад, а кои ги користеле К.М.(40) и З.Ј.(52) од Ресен. Притоа, било констатирано дека лицата не поседуваат никаква документација за дејноста која што ја вршат и немаат регистрирано правно лице за вршење на дејноста.
-По целосно документирање на случаите, против лицата ќе бидат поднесени соодветни пријави, додаваат од МВР.