Почна реализацијата на втората фаза од проектот за проширување на патот кон рекреативниот центар Теферич. Предвидено е проширување на 500 метри од патот, колку што беа опфатени и во првата фаза минатата година од црквата „Свето Преображение” кон населбата Пржино.
– Ова е реализација на втората фаза на проширување на патот кон Теферич која освен проширувањето, ќе опфати и поставување нов асфалт, изработка на тротоар од левата страна и негово поплочување со бекатон плочи, во должина од нови 500 метри, рече при денешниот увид наградежните работи градоначалничката на општина Кисела вода Билјана Беличанец Алексиќ.
Ова, посочи, е втор начин како да се дојде до Припор, до Сопиште и до другите населени места во Сопиште, освен преку главната делница сообраќајница „Христо Татарчев”.
Со проектот се предвидува и трета фаза, за која општината ќе аплицира веќе следната година и која, ако повторно биде поддржана, ќе овозможи проширување на последните 300 до 350 метри од патот. Со проектот е предвидено и поставување на осветлување, за што следната година треба да почне тендерска постапка.
-Вкупната вредност на втората фаза на проектот изнесува 6.650.000 денари од кои 5.539.797 ден се обезбедени од Бирото за регионален развој, а 1.100.000 денари обебзеди општина Кисела Вода. Скопскиот плански регион, како носител на проектот, преку Министерството за локална самоуправа, Бирото за регионален развој, досега има инвестирано околу 11 милиони денари.