За две недели во Скопје ќе пристигне Оливер Боилор, врвeн хирург за трансплантација на црн дроб од Центарот за трансплантација во Лион, Франција. Ова е договорено на средбата на делегацијата од Македонија предводена од директорката на Фондот за здравствено осигурување, Маја Парнарџиева Змејкова со генералната директорка на Француската Агенција за биомедицина, Еманануеле Прада-Борденав.
На средбата во Агенцијата во Париз, соопшти ФЗОМ, беше презентиран целосниот систем за организација на кадаверична трансплантација и донорство на органи. Од ФЗОМ информираат дека тоа е од посебно значење поради фактот што во Република Македонија не се извршува тој тип здравствена услуга – трансплантација на црн дроб од жив дарител.
Улогата на проф. д-р Оливер Боилор во Македонија, како што се наведува, ќе биде во насока на почнување и развој на трансплантацијата на црн дроб од жив дарител во соодветните јавни здравствени установи, увид во состојбата на капацитетите и кадарот за трансплантација на црн дроб, но ќе биде и добра подготовка за идните тимови кои ќе вршат трансплантација на црн дроб од жив дарител или кадавер.
– Професорот веќе има работено на вакви проекти во други држави и со голем успех го воспоставил и развил овој тип на здравствена услуга. Агенцијата за биомедицина е расположена да даде подршка за развој на софтверско решение за креирање на листа на чекање за пациенти на кои им е потребна трансплантација на ткива и органи во Македонија, стои во соопштението од ФЗОМ.
Воедно, како што се наведува, веќе е договорена соработка со болницата „Сен Луј“ во Париз каде во иднина ќе се врши доедукација и обука на македонските хирурзи кои ќе се подготвуваат за вршење на трансплантација на бубрези и панкреас во еден акт.
Досега во Република Mакедонија успешно се врши трансплантација на бубрези од жив дарител, а во иднина, преку таа соработка ќе може да се врши и трансплантација на бубрези за пациентите кои се на дијализа, а се инсулино-зависни (дијабетичари) на кои им е потребно и трансплантирање на панкреас.
Во делегацијата од Македонија која од 7 до денеска престојуваше во работна посета на Француската Агенција за биомедицина, беа претседателот на Лекарска Комора на Македонија, проф. д-р Кочо Чакалароски, проф. д-р Сашо Дохчев од Клиниката за урологија, доц. д-р Игор Николов од Клиниката за нефрологија и Луиза Јакимовска, шеф на Кабинетот на директорката на ФЗОМ.