Околу 500 вработени во фабриката за заварени цевки и профили ФЗЦ „11-ти Октомври“ од Куманово, денеска започнаа генерален штрајк. Причината за штрајкот се неисплатени плати и придонеси за изминатите седум месеци, а дел од работниците се и на принуден одмор.
Претседателот на синдикалната организација во фабриката, Методија Сизовски изјави дека претходно имале повеќе прекини на работа, но благодарение на совеста на не стапиле во штрајк.
-За овој период сите заштеди кои што ги имавме и залихи ги потрошивме, останувајќи без основна егзистенција. Голем дел од вработените се задолжени со кредити и други давачки -наведе тој.
Сизовски додаде дека синдикатот е подготвен веднаш да го прекине штајкот доколку се постигне договор со работодавачите, односно доколку им исплатат две плати до Нова година.
Дел од работниците наведоа дека работодавачите ова го прават со цел да се приватизира фабриката.
-Фабриката не работи затоа што треба да се приватизира по ниска цена, ако таа работеше дали ќе се продадеше по таква цена. Ние се сомневаме дека некој сака да ја купи фабриката за ниска цена- изјави Слободан Ивановски.
Работниците истакнаа дека нема да се вратат на работа и дека ќе продолжат со штајкот се додека не се исполнат нивните барања.
Новинарските екипи побараа да се сретнат со надлежните во фабриката, за да се слушне и нивниот став, но тие го одбија барањето со образложение дека се на состанок.
Е. Г.