Водата од градскиот водовод во Струга е забранета за пиење заради бактерии, покажуваат анализите на Центарот за јавно здравје – Охрид, направени пред три дена.
Раководителот на Центарот, Атанаско Михаилов денеска во изјава за МИА потврди дека во последните микоробиолошки анализи на водата од Струшкиот водовод на барање на Агенцијата за храна и ветеринарство на мостри земени од пред три дена покажале дека во водата е пронајдена бактерија ешерихија коли, енерококи и други колиформни бактерии и оти не се хлорира.
– Според Законот, водата е неупотреблива за пиење заради бактерии и затоа инспектор од АХВ донесе решение за времена забрана за пиење на водата од градскиот водовод во Струга. Анализи ќе се прават се додека не се исхлорира и додека не одговара на нормативите и стандардите за квалитет за да може да се користи за пиење, рече Михаилов.
Одговорноста, според него, е кај локалната самоуправа и локалното претпријатие „Проаква“, бидејќи надлежностите за исправноста на водата се нивни.
Аднан Речи, одговорен во Јавното претпријатие „Проаква“ истакна дека неисправноста на водата е поради немање хлор, но, според него, проблемот е надминат.
– Трет ден се преземаат мерки, водата се хлорира и сега е чиста и може да ја користат граѓаните за пиење и друга употреба. Штом се хлорира водата, таа се дезинфицира и нема бактерии, потенцира Речи.