Министерот за внатрешни работи, Ахим Нухиу изјави дека поднел барање до Владата на РМ за разрешување на Митко Чавков од функцијата Директор на Бирото за јавна безбедност поради немилите настани кои се случија во Собранието. Министерот Нухиу потврди дека дел од структурите на МВР предизвикале многу штета на Република Македонија и на демократските вредности.
Во интерес на истрагата и понатамошните случувања, министерот за внатрешни работи го назначил државниот советник во Бирото за јавна безбедност, Горанчо Савовски, за координатор на Оперативниот штаб.
-Ова што се случи во Собранието во четвртокот е големо зло. За да ја поправиме оваа штета ќе биде потребно долго време и ангажман, не само од сите служби на МВР туку и од другите институции како Јавното обвинителство и судство, рече Нухиу.
Тој информираше дека е формирана работна група составена од професионалци од МВР која има задача да утврди дали Оперативниот штаб и организационите единици во МВР постапувале согласно утврдените процедури пропишани во министерството, за направени пропусти, пречекорувања на овласувањата или неизвршувања на работните задачи.
-Заклучоците од извештајот на работната група ќе бидат дел од известувањето до Јавното обвинистелство за понатамошно постапување за работата на Оперативниот штаб, вели Нухиу.
Министерот ги повика сите вработени во МВР да се вклучат активно во истрагата и да достават службени материјали за настаните во Собранието минатиот четврток.
-Враќање назад нема, работите мора да се расчистат и секој ќе одговара за своите постапки, вели Нухиу.
Виктор Јованов