Додавање на придавката Северна пред името Македонија во целиот текст на Уставот, измени на преамбулата на Уставот во согласност со договорот со Грција, поцврста гаранција за неповредливост на границите и територијалниот интегритет, како и грижа за Македонците и дијаспората во странство. Ова се четирите амандмани за промена на Уставот што Владата ќе ги достави до Собранието, информираше владиниот портпарол, Миле Бошњаковски по денешната вонредна седница на Владата.
Тој истакна дека за две од четирите точки, односно поцврстата гаранција за неповредливост на границите и територијалниот интегритет, како и грижа за Македонците и дијаспората во странство веќе биле направени измени во Уставот во 1992-та година.
Бошњаковски не сакаше да одговори дали Владата успеала да ги убеди оние 10 пратеници кои недостасуваат за дво-третинско мнозинство за уставни промеи, но кажа дека тие се обврзани да гласаат во согласност со волјата на граѓаните што ја искажаа на референдумот.
„Владата ќе го достави до Собранието предлогот за уставните измени. Пратениците без разлика на која партија припаѓаат имаат обврска кон граѓаните да го обезбедат патот кон ЕУ и НАТО кој води преку договорот со Грција. Од пратениците се очекува да донесат одлука во оваа насока. Народот направи важен избор“, рече Бошњаковски.
Амандманите ќе бидат доставени до уставната комисија во Собранието, со што ќе започне расправа која деловнички трае 10 дена, по што ќе биде јасно дали владејачкото мнозинство успеало да ги обезбеди 80-те пратенички гласа. Според извори од пратеничките групи ова мнозинство засега не е обезбеднено, но продолжуваат преговорите со опозициските пратеници. Од наjголемата опозициска партија ВМРО-ДПМНЕ, деновиве истакнаа дека не отстапуваат од претходните ставови дека нема да поддржат промени на Уставот.
Виктор Јованов