Владата ќе набавува фитнес трака, тежини за шипки, опрема за тежина, фитнес точак и фитнес трака со наслон за грб.
Премиерот Никола Груевски пред два дена во емисијата “Јади бурек“ кажа дека секојдневно вежба на статичен велосипед и на подвижна трака, а сега неговиот пример ќе мора да го следат сите функционери во Владата.
Со набавката на справите од владата се создаваат услови да се вежба на работа а не во домашни услови.
Службата за општи и заеднички работи ги набавува фитнес справите за кои Груевски рече дека секојдневно ги користи.
„Пет до шест дена трчам на трака еден ден прескокнувам. Возам на точак дома на овие што се статични и нешто на мултифункционална справа. Обично играм и фудбал ама повредата ме извади од колосек па паузирав доста“, изјави Никола Груевски.
Од службата процениле дека за набавка на оваа опрема се потребни 2.245.763 милиони денари без вклучен ДДВ или околу 36.000 евра.
На страната на бирото за јавни набавки стои дека при спроведување на постапката ќе се користи електронска аукција ,а набаката е деллива што значи дека потребните фитнес справи можат да ги набават повеќе фирми.
Дополнителни информации во врска со електронската аукција:
„Договорниот орган ќе користи електронска аукција како последна фаза во постапка. Предмет на аукцијата е вкупната цената на предметот на договорот за јавна набавка со сите вклучени попусти без данок на додадена вредност, односно најниската цена од прифатливите понуди поднесени во првичната фаза од постапката. Поканите за учество на аукцијата ќе се достават во електронска форма преку ЕСЈН по целосната евалуација на првичните понуди, до сите економски оператори кои доставиле прифатливи понуди во првата фаза од постапката и кои се регистрирани во ЕСЈН. Во поканата за учество на аукцијата ќе бидат содржани следниве податоци: почетната цена на аукцијата, односно најниската цена од првично поднесените понуди; датумот и часот на започнување и завршување на аукцијата; како и интервалот во кој ќе се спроведува негативното наддавање (минимална и максимална разлика во понудени цени). За да можете да учествувате на електронската аукција, потребно е да се регистрирате во ЕСЈН“, стои на страната на бирото за јавни набавки.
Понудите стреба да се достават најдоцна до 17-ти февруари.
Единствено што останува нејасно во набавката на фитнес справите е кога премиерот и министрите ќе вежбаат со оглед што нивното мото е 24/7 или непрекината работа.