Благодарение на дождот од вчера во велешко нема ниту еден од многуте пожари кои изминатите денови беснееја во тој регион, во кој е вклучена и општина Чашка каде беше воведена и кризна состојба.
Од Регионалниот центар за справување со кризи – Велес предупредија дека постои голема опасност во секој час големиот шумски пожар од кај селото Никодин, прилепско, да премине во велешкиот реон на планината Јасеновска глава.
– Потребно е брзо да се реагира со авионите на Дирекцијата за заштита и спасување за да се спречи да се прошири во велешко, посочува Влатко Добревски од Регионалниот центар за справување со кризи.
Инаку во велешко во изминатите денови беснееја неколку пожари и тоа: кај селото Дреново каде изгоре 70-тина хектари најразноводна нискостеблеста шума, кај Иванов врв, Богомила и во месноста викана Бела Вода и од пред два дена северозападно од селото Горно Јаболчиште.
