Општина Велес деновиве преку тендер ја ангажира скопската фирма „Изолација“ чии екипи неделава интензивно работат на поставување нов асфалт на длабнатините и оштетувањата на велешките улици и сообраќајниците.
Од oпштина Велес им порачуваат на граѓаните кои учествуваат во сообраќајот со своите автомобили да бидат внимателни поради се уште недовршените градежни работи.
Орце Николов од службата за информирање на oпштина Велес информира дека ова е редовно крпење на улиците коe се изведува по зимскиот период или едно од неколкуте годишни.
Посочи дека поради снегот и мразот низ улиците во Велес оваа зима биле фрлени повеќе тони сол и ризла со што многу се оштетиле улиците и поради тоа, како што рече, сега е потребно подолго време да се израмнат со нов асфалт сите длабнатини и оштетувања на улиците.
– Затоа апелира до граѓаните посебно до возачите додека траат градежните зафати да бидат посебно внимателни во одвивање на сообраќајот низ градските улици. Со завршување на работите во многу ќе се придонесе за поголема безбедност на сите учесници во сообраќајот, потенцира Николов.