Здружението Јаболчиња по повод денот на шегата 1 април в понеделник за првпат во Тетово ќе организира Априлијада со забавен карактер под мотото „Шега за насмевка“, информираше директорот на Јаболчиња, Никола Димовски на денешната прес-конференција.
Тој рече дека веќе се информирани сите основни училишта и градинките во Тетово од каде се очекуваат најголемиот број на учесници на оваа улична забава.
Активностите ќе започнат околу 12 часот напладне на градскиот плоштад од каде сите учесници во колона ќе започнат со прошетката низ централните градски улици и булевари поради што од страна на полицијата определените делови од улиците ќе бидат блокирани за сообраќај на автомобили. На почетокот од колоната ќе се движат музичари, а учесниците треба да бидат маскирани и имаат можност како групи да носат и шеговити пароли. По прошетката од околу половина час повторно ќе се вратат на плоштадот каде забавата ќе продолжи со настап на детските звезди од фестивалите Блета зот и Јаболчиња, а тука ќе бидат прогласени и трите најуспешни маски, изјави Димовски.
Димовски очекува манифестацијата по повод 1 април да стане традиционална и дека на овој начин Тетово ќе го одбележи овој ден во духот на уличните забавни програми карактеристични за големите градови.