Учениците од повеќе тетовски основни училишта денеска со симболично возење велосипед го одбележаа 22 септември – Светскиот ден без автомобили.
Педесеттина велосипедисти двапати поминаа по булеварот „Маршал Тито“ од кружниот тек кај Центарот за култура „Иљо Антески Смок“ до кружниот тек кај зелениот пазар. За сето време, сообраќајот за автомобилите и другите возила на овој дел од сообраќајницата беше блокиран.
На настанот присуствуваше и градоначалничката на општина Тетово, Теута Арифи.
– Во соработка со училиштата и општинскиот Сектор за сообраќај го одбележавме Меѓународниот ден без автомобили. Политиката на општината е се повеќе да ги ослободиме тротоарите за пешаците, а каде има можности да поставиме и патеки за велосипедистите, како низ градот, така и кон месноста Бањиче. Сите имаме обврска да придонесеме во зачувување на амбиентот и животната средина, изјави Арифи.
Во рамки на одбележувањето, невладините организации „Еко Акција“ и „Мултикултура“ заедно со учениците од средното текстилно училиште „Ѓоце Стојчевски“ на градскиот плоштад организираа лотарија за оние кои дојдоа со велосипед, ролерки или слични реквизити.