Во Тетово 10-та година по ред ќе се одржи Фестивалот на новиот германски филм од утре до петок, при што ќе бидат прикажани 5 нови германски филмови произведени во текот на минатата и оваа година.
Според Бујар Љума, од невладиниот Центар за балканска соработка „Лоја“ од Тетово, фестивалот се организира заедно со Амбасадата на Германија во Скопје.
– Фестивалот на новиот германски филм станува културно обележје на Тетово и „Лоја“ со задоволство е партнер на германската амбасада во неговата реализција сите овие десет години, изјави Љума.
Според Хелга Тајпел од одделението за култура при германската амбасада нивните напори за изградба на добар темел за културна и друга соработка помеѓу Македонија и Германија како врвно достигнување го има фестивалот на новиот германски филм.
– Германија има доста голема филмска продукција и не е лесно да се направи најдобриот избор но сметам дека со одбраните филмови ќе го привлечеме вниманието на тетовската публика. Сите филмови се оригинални а ќе се прикажат со превод на македонски и албански јазик, рече Тајпел.
Според најавите на организаторите отворањето на Фестивалот на новиот германски филм ќе се одржи утре во 20 часот со проекција во Центарот за култура „Иљо Антески Смок“ со трагикомедијата „Родители“, додека во четвток и петок ќе бидат проекциите на комедијата „Фак ју Гете“, драмата „Паркот на среќата“, детскиот филм „Рики“ и документарниот филм Германија.