Градот Скопје ги информира граѓаните дека во рамките на проектот за автоматизирано управување на сообраќајот од денеска до 18-ти овој месец ќе се врши калибрација на адаптивната контрола на сообраќајот на неколку крстосници во градот.
Поради тоа, како што информираат од Град Скопје, на крстосниците може да се појави застој во одвивањето на сообраќајот, како и нарушување на координацијата на семафорите, односно на зелените бранови.
Градот Скопје апелира до сите учесници во сообраќајот да покажат разбирање додека се врши калибрација на адаптивната контрола на сообраќајот и да ги почитуваат светлосните сигнали на градските улици.
Активностите за калибрацијата на адаптивната контрола на сообраќајот ќе ги врши италијанската фирма МИЗАР, која е изведувач на системот за управување на сообраќајот од проектот за автоматизирано управување на сообраќајот во Скопје.
Калибрацијата е процес којшто бара во одредени периоди од денот на крстосниците да биде активиран адаптивниот начин на контрола на сообраќајот во зависност од сообраќајното оптоварување на крстосниците со цел да се увидат проблемите и да се калибрираат параметрите за адаптивна контрола за најдобро да се опслужуваат сообраќајните текови, велат од Градот Скопје.