Во Ново Село во Штип нема штети, иако постоеше опасност од поплави. Локалната самоуправа денеска информира дека нивото на реката Брегалница на неколку клучни точки останало непроменето.
– Обиколницата околу Ново Село, која во 2013 беше поплавена, а со тоа и домовите на куќите покрај неа, остана сува. И покрај прелевањето на браната Мантово со околу 113 м/3 вода и дотек на околу 290 м/3 во акумулацијата, нема штети во Ново Село во Штип, а со тоа и на имотите на луѓето, соопшти општина Штип.
Нивото на Брегалница кај населбата „8-ми Ноември“ и во Ново Село утрово е на истото ниво како и доцна синоќа во 21 часот, кога се очекуваше и првиот бран на излевање.
Во изминатите 24 часа локалната власт заедно со припадниците на АРМ, МВР, ЦУК, јавните претпријатија и државните органи обезбедија појас од неколку илјади вреќи со песок на критичните точки околу обиколницата во Ново Село.
Локалната самоуправа најави и преземање на мерки со кои ќе се обезбеди коритото на Брегалница на неколку клучни точки, кои ќе бидат трајни решенија за во иднина да нема вакви ситуации.