Завршуваат градежните работи на Градската капела во Пробиштип. Градоначалникот на општина Пробиштип, Тони Тоневски информира дека деновиве со подобрување на временски услови стартувала доизградбата на капелата, која чини околу осум милиони денари, а средствата се обезбедени од буџетот на општината.
-Во моментов се работи на капелата, надворешно речиси е затворена, поставена е изолација. Во моментов се работи на поставување на прозорците, вратите и на внатрешното уредување, истакна Тоневски.
Градската капела во Пробиштип се очекува да биде ставена во употреба за околу еден месец, кога треба да завршат сите градежни работи. Објектот е со површина од 300 м2, а предвидено е и да се набават ладилници и да се опреми по сите стандарди за погребалните услуги. Инаку, секоја општина согласно законските прописи мора да има Градска капела.