Општина Куманово утре ќе спроведе дератизација и дезинсекција на својата територија. За дератизацијата и дезинсекцијата општината одвои 600 илјади денари.
– Дератизацијата ќе се изврши со поставување мамки против глувците во отворите од шахтите од постоечката канализациска мрежа, а ќе бидат опфатени и отворите што служат за собирање атмосферска вода, информира општина Куманово.
Дератизацијата ќе се врши според пропишаните стандарди. Препаратот што ќе се користи влегува во групата на антикоагуланти и ќе биде во облик на парафински блок. Од општина Куманово апелираат граѓаните да не се движат во близина на реката Кумановка и на кејот.
Ако дозволат временските услови утре ќе се изврши и дезинсекција против крлежи на јавно зелените површини со цел спречување на ширењето на заразни болести. Дезинсекцијата ќе се спроведе околу градскиот кеј, парковите, површините пред клучните државни и општински институции, плоштадот… Третираните површини ќе бидат обележани.
Од општина Куманово предупредуваат дека не е препорачлив подолг престој на третираните површини, непосредно по извршената дезинсекција.