Почна реконструкцијата на булеварот „Ослободување“ во Кичево. Се острануват старите дрвја, се поставува нова фекална канализација, ќе се пошират двата правца и ќе се уреди целосно простор за паркирање.
Засилено се работи и на реконструкција на Калето кое ќе добие нови патеки, одморалишта и зеленило.
– Забрзано се работи на целосна реконтрукција на булеварот кој од двете страни ќе се прошири на осум метри со што сообраќајот ќе се одвива нормално, а ќе има место и за паркирање во двата правца. Остранети се киосците на тротоарите кои, исто така, ќе се обноват, ќе се засадат нови дрвја место старите, ќе се уредат зеленилото и сигнализацијата заедно со јавното осветлување, информира портпаролот на општината Емин Насуфи.
Според него, ќе има и два кружни тека на крстосниците.
Проектот вреден околу еден милион евра е инвестиција на општината. Предвидено е да се реализира 18 месеци со пауза од 15 јули поради летните одмори и доаѓањето на печалбарите.
Реконструкцијата на Калето која ќе чини 80.000 евра, ја финансира Светска банка.
Како што истакна Насуфи, со овие два проекта Кичево ќе добие комплетно нов лик.