Со цел да се подобри безбедноста на учениците во училиштата и да се намали бројот на кривични дела и нарушувања на јавниот ред и мир со елементи на насилство сторени од страна на ученици, отсекот за превенција при СВР Охрид и полициската станица од Кичево, денеска во Кичево го реализираа превентивниот проект „Почитувај ја различноста“.
Проектот се реализира во основното училиште „Санде Штериоски“ и нуди низа теми поврзани со насилството со посебен осврт на насилството на социјалните мрежи и причини за насилството меѓу учениците.
Проектот понуди низа пауер поинт презентации на теми по сопствен избор на учениците за надминување на стереотипите и предрасудите со можностите за градење меѓусебна доверба но и други актуелни теми по избор на учениците.
Учесници во проектот беа учениците од македонските, албанските и турските паралелки кои на крајот добија ранци со логото на проектот обезбедени од мисијата на ОБСЕ во земјава.
– Проектот треба да го поттикне учеството и соработката на вработените во училиштата, родителите и учениците во создавање на услови за безбедна средина и активно вклучување на сите во градење на безбедноста во училиштата. Основната идеја е да се интензивира и зајакне комуникацијата меѓу учениците но и да се унапреди соработката и партнерскиот однос на полицијата со училиштата и со локалната самоуправа, истакна портпаролот на СВР Охрид Стефан Димоски.