Во градската библиотека при НУЦК Кочо Рацин во Кичево беше презентиран проектот „Мултикултурна повеќејазична дигитална библиотека“, во чии рамки во период од 12 месеци, од 1 јуни годинава до 31 мај 2018 година, се очекува многу млади и непознати автори за прв пат да ги објават своите дела.
Можност да учествуваат во проектот имаат сите млади автори од етничките заедници (Македонци, Албанци, Турци, Роми и Срби) од Република Македонија, регионот и дијаспората. Жанрот на делата за доставување не е ограничен, т.е. авторите може да конкурираат со проза, поезија и драма.
– Од сите пристигнати текстови издавачката комисија на проектот ќе избере 12 дела од автори од сите етнички заедници што ќе бидат објавени во бесплатната дигитална библиотека на Фондација Македоника. Делата ќе бидат објавени двојазично, на македонски јазик и на мајчиниот јазик на авторите (албански, турски, ромски и српски). Во рамките на дигиталната библиотека ќе биде организиран и социјален форум каде читателите ќе ги коментираат и оценуваат објавените текстови, рече Андреа Ичокаева Бундалевска која е дел од тимот Фондација Македоника.
Проектот го реализира Фондација Македоника, со поддршка на „ЦИВИКА МОБИЛИТАС“.