Владиното Координативно тело за заштита на индустриска и интелектуална соспстеност спроведе акциска контрола на софтверите во Гостивар. Вчера во периодот од 10 до 17 часот биле контролирани 14 фирми кои се занимаваат со услужни дејности.
Според Мите Костов, претседател на Координативното тело за заштита на индустриска и интелектуална соспстеност, при контролата биле пронајдени и одземени вкупно 29 компјутерски куќишта со нелиценциран софтвер, од кои 23 се пронајдени во еден интернет-клуб, три во две геодетски друштва и едно во друг интернет-клуб.
Во една кабловска телевизија, пак, откриено е дека емитувала четири неоткупени канали.
– Радува фактот што расте свеста за користењето на лиценцирани софтвери и почитувањето на законската регулатива за заштита на интелектуалната сопственост, а се намалува и бројката на поплаки, рече Костов.
Тој посочи дека е постапувано и на поплака од странска фирма според која во Здуње, гостиварско една фирма ја повредила индустриската сопственост со производство на чипс. Производите кои се запакувани во амаблажа на заштитената марка ќе бидат ставени вон употреба.
По целосното расчистување на сите поединости, сопствениците на објектите ќе се соочат со соодветни поднесоци.
Во текот на денов, овластени лица ќе продолжат да вршат контроли низ гостиварските фирми.