Во општина Гевгелија се отворени пет нови пензионерски домови во населените места Миравци, Негорци, Прдејци, Мрзенци и Богородица.
Со сопствени средства гевгелиското здружение на пензионери успеа за кус временски период да ги приспособи руинираните и запуштени простории во споменативе населени места и да ги претвори во удобни катчиња за собирање на пензионерите.
Домовите, како што рече претседателот на здружението Ристо Танелов, поседуваат оптимални услови за функционирање, санитарни јазли, современа опрема за седење, печки, телевизори и кујни.
Општина Гевгелија ги реши сите имотно-правни односи за пензионерските домови, а во наредниот период ќе помогне во опремувањето со реквизити за друштвени игри,вети градоначалникот Иван Франгов кој на отворањето на домовите на сите пензионери им посака добро здравје и што повеќе да ги користат просториите за другарување и разонода.