Во двете акумулации Липково и Глажња има доволни колични вода, информираат надлежните од водостопанство „Кумановско-липковско поле“. Според последните мерења во двете акумулации има 9 милиони кубни метри вода, количина доволна за потребите на Куманово.
– Оваа година очекуваме поголеми успеси бидејќи минатата година Владата инвестираше средства во системот за наводнување, конкретно за санација на затворачите на браната Липково и за ревитализација на затворачите на браната Глажња, вели директорот на „Кумановско-липковско поле“, Филип Филиповски.
Според Филиповски, станува збор за витални делови,а за нивно осовременување, Владата инвестирала 10 милиони денари. Со овие инвестиции, подвлекува, водата од браните се користи рационално и нема да има непотребно излевање посебно во сушни периоди. Бенефиции од модернизираните затворачи ќе има и месното население кое водата ја користи за наводнување на полињата.