Стар Дојран денеска беше домаќин на манифестацијата „Сите на велосипед“, којашто се одржа во рамки на акцијата „Мај месец на велосипедисти“.
На промоцијата на велосипедизмот масовно се одѕваа велосипедисти од Дојран и соседните општини од југоисточниот дел на земјата, кои учествуваа во трката што се возеше на рекреативната патека од црквата „Свети Илија“ до граничниот премин „Дојран“ во должина од 3,5 километри.
– Афирмацијата на велосипедизмот со посредство на вакви акции има за цел помасовно вклучување на сите возрасни категории граѓани во спортските активности како и подигнување на нивната свест за користење на ова превозно средство кое не ја загадува животната средина и, воедно, е особено корисно од здравствен аспект, изјави градоначалникот на општина Дојран, Борче Стамов.
Акцијата што веќе неколку години успешно се спроведува низ повеќе градови во земјата, годинава прв пат се одржа во Дојран во организација на Републичкиот совет за безбедност на сообраќајот на патиштата, Министерството за внатрешни работи, општина Дојран и Велосипедската федерација на Македонија.