Група средношколци од Дојран и околината заедно со локалното население денеска со туристичка прошетка околу Дојранското Езеро ќе го одбележат Светскиот ден на птиците преселници.
Учесниците на настанот ќе бидат информирани за значењето на птиците преселници и потребата за нивна заштита.
Годинава по повод Светскиот ден на птиците преселници ќе се организираат над 200 јавни настани низ целиот свет и тие ќе вклучуваат фестивали за птици, едукативни програми и екскурзии. Оваа година темата на светската прослава е „Птиците преселници и туризмот“ и ги истакнува врските меѓу заштитата на птиците преселници и развојот на локалниот еко-туризам.
– Дојран е препознаен како клучно подрачје за биолошка разновидност и спектакуларните движења на птиците преселници може во иднина да привлечат туристи од земјава и странство. Оваа општина има голем потенцијал за развој на еко туризам кој ќе вклучува набљудување и фотографирање на птици, активности кои ќе бидат корисни за дивиот свет, локалното население и туристите, изјави Ксенија Путилин, асистент на проектот за едукација и градење капацитети на Дојранското Езеро од Македонско еколошко друштво.
Одбележувањето на Светскиот ден на птиците преселници го организираат Македонското еколошко Друштво (МЕД) и општина Дојран.