Регионалното одделение на Дирекцијата за заштита и спасување во соработка со општинските штабови за заштита и спасување од Битола, Могила и Новаци, претпладнево е на сите критични места долж реките Црна и Драгор каде по вчерашниот пороен дожд е зголемено нивото на водата во коритата што минуваат низ битолскиот дел на Пелагонија.
Според Димче Јошевски, раководител на регионалното одделение на Дирекцијата за заштита и спасување, ситуацијата е под контрола, а на критичните места е поставен заштитен појас.
– Дождот престана да паѓа и тоа ја смирува состојбата на терен каде според првичните информации под вода се околу 300-400 хектари од битолско поле. Најкритична е ситуацијата кај селата Кравари и Егри и тие места се засилени со механизација и луѓе кои ги чистат затворените канали. Нивото на реката Драгор се смирува, додека нивото на Црна достигна 4,20 метри, истакна Јошевски.
Најголеми проблеми предизвикува т.н. петти канал кој е прекинат во еден дел по неговиот тек.